AmnestyMagasinet 4, 2007: Hva har Amnesty fått til i 2007?

KINA

Amnesty har byrja nedteljinga til OL i Beijing 2008 ved mellom anna å lansere ei handbok i menneskerettar for journalistar som skal dekke OL. Kina-arbeidet har også fokusert på bruken av dødsstraff i Kina. I januar 2007 blei det bestemt at dødsdommar i Kina skal godkjennast av landets høgsterett. Dette skal i følgje kinesiske myndigheiter bidra til å hindre justismord og føre til ein reduksjon i talet på avrettingar. Kinesiske myndigheiter opplyser at talet på avrettingar allereie er redusert med ti prosent i løpet av 2007. Amnesty har også forsøkt å påverke kinesiske myndigheiter ved å delta i menneskerettsdialogen mellom Noreg og Kina.

Les meir om Amnestys arbeid på Kina her

USA

Avsløringar om store manglar ved bruk av giftsprøyter under avrettingar førte til at domstolane i fleire amerikanske statar beordra midlertidig stans i alle avrettingar.

I oktober gav USAs føderale høgsterett ein dødsdømd medhald i ei klage, og avrettinga er utsett til saka er utreda. Truleg fører dette til ein full stans i alle avrettingar i USA til denne saka er avgjort. Dei særskilde militærtribunalane som skal brukast til å stille utanlandske terrormistenkte for «retten», måtte igjen innstillast inntil vidare fordi dommarane sjølve påpeika nye manglar. Talet på internerte på Guantánamo-basen synk, og er no nede i 290. Amnesty held fram aksjonen «Steng Guantánamo» for å legge ytterlegare press på USA.

Les meir om Amnestys arbeid på USA her

RUSSLAND

Amnesty har arbeida for at dei ansvarlege må bli stilt til ansvar for menneskerettsbrot mot sivile i Tsjetsjenia, og i oktober fann Den europeiske menneskerettsdomstolen Russland skuldig i drap på sivile under eit angrep i 2000. Framleis har ikkje Russland sjølv etterforska saka. I forkant av eit statsbesøk i Russland tok Amnesty opp tre forsvinningssaker frå Tsjetsjenia med statsministeren. I slutten av november blei den tidlegere russiske politimannen Sergei Lapin dømd til over ti års fengsel for å ha torturert tsjetsjenaren Zelimkhan Murdalov. Amnesty i Noreg har spesielt arbeide med denne saka og dommen vil vere ein viktig prinsippavgjering med omsyn til mange andre liknande saker i Russland.

Eit menneskerettsundervisningsprosjekt for lærarar i Murmansk er vidareført, og i september arrangerte Amnestys gruppe i Hammerfest Barents Menneskerettskonferanse med deltakarar frå Sverige, Finland og Russland.

Les meir om Amnestys arbeid på Russland her

SUDAN

Amnesty har i 2007 arbeida for å få på plass ein effektiv fredsbevarande styrke i Sudan, og i juli vedtok FNs tryggingsråd å utplassere ein internasjonal styrke beståande av soldatar frå FN og Den afrikanske union (AU). Sudanske myndigheiter har vedteke resolusjonen, men det er framleis eit stykke fram til eit reelt vern av sivile. Amnesty har også arbeida for at dei som har begått grove overgrep mot sivilbefolkninga blir stilt til ansvar. Den internasjonale straffedomstolen har no utstedt arrestordre på fleire.

Les meir om Amnestys arbeid på Sudan her

TYRKIA

Amnesty i Noreg observerte i 2007 fleire rettssaker som gjaldt bruken av ytringsfridom og retten til å nekte militærteneste. Amnesty i Noreg støtta Amnesty i Tyrkia sitt arbeid for å få fleire krisesenter for valdtekne og mishandla kvinner og gav Amnesty i Tyrkia finansiell støtte i deira kampanje mot vald mot kvinner. Amnesty i Noreg deltok også i deira postkortaksjon for å få fleire krisesenter i millionbyen Istanbul.

I 2007 har Amnesty i Noreg gjennom Right Education Action-programmet frå TV-aksjonen 1999 gitt Amnesty i Tyrkia moglegheit til å gje 30 Amnesty-medlemmar og 40 lærarar opplæring i menneskrettsundervisning. Desse igjen har undervist om menneskerettane i og utanfor skuleverket. I tillegg har 25 religiøse leiarar gjennomgått kurs om kvinner sine rettar. Amnesty i Tyrkia har også utvikla undervisningsmateriell i samarbeid med Undervisningsministeriet.

Les meir om Amnestys arbeid på Tyrkia her

ISRAEL OG DEI OKKUPERTE PALESTINSKE OMRÅDA

Amnesty har i 2007 fokusert på økonomiske, sosiale og kulturelle rettar i Israel og Dei okkuperte palestinske områda. Dessverre har ikkje Amnesty greidd å endre situasjonen vesentleg, til det er situasjonen altfor fastlåst. Men Amnesty har bidratt til å halde merksemda rundt dei forferdelege sosiale forholda som palestinarane må leve under på grunn av okkupasjonen, og klart å bringe menneskerettar inn i debatten om framtidige løysingar på konflikten mellom israelarar og palestinarar.

Med midlar frå TV-aksjonen 1999, har Amnesty Israel i år styrka kursleiargruppa som har hatt menneskerettsundervisning for nær 200 lærarar og omtrent 3000 elevar og studentar. Dei jobbar både i vanlege skular og i spesialskular for vanskelegstilte born. Nær 5000 born og unge er med i aksjonar for menneskerettane. Amnesty Israel har også vidareført undervisningsarbeidet i eit drusisk og to beduinske lokalsamfunn.

Les meir om Amnestys arbeid på Israel og Dei okkuperte palestinske områda her

PAKISTAN

Amnesty har arbeidd mot såkalla «forsvinningar» saman med familiane til dei «forsvunne». I februar blei det arrangert ein workshop i Lahore i samarbeid med Amnesty Sverige og «Human Rights Commission of Pakistan». Målet med workshopen var å knyte familiane til dei «forsvunne» saman, lære dei å bygge nettverk for å kunne verne seg sjølve og gjere dei merksame på kva rettar dei har. Amnesty har i tillegg jobba mot dødsstraff og vald mot kvinner i Pakistan i form av aksjoner og kampanjar.

Les meir om Amnestys arbeid på Pakistan her

IRAN

I juni blei det publisert ein rapport om avrettingar av mindreårige som fekk mykje merksemd. Amnesty i Noreg har i 2007 fokusert på enkeltsaker, og då særleg på dødsstraff og mindreårige. Sjølv om det i 2007 blei avretta fleire i Iran enn på mange år, har Amnesty vore med på å stanse fleire avrettingar i nært samarbeid med iranske menneskerettsforkjemparar både i og utanfor Iran. I tillegg har samarbeidet med Utanriksdepartementet fungert godt, og UD har teke opp mange saker om born og steining. Barne­dagen 20.november blei markert med aksjonar mot avrettingar av mindreårige i Iran.

Les meir om Amnestys arbeid på Iran her